Lobaparda: Música Tradicional Aragonesa

Lobaparda ye una colla mosical que naxe en 2006 n’a ziudat de Teruel, dimpués de i trobar-sen a rabelle cuatre mosicaires con firme delera per os sons tradizionals aragoneses y a mosica folk. Atamas d’a suya chobentut, os miembros de Lobaparda tienen asabelo d’esperenzia en ista mena de mosicas; grupos como La Birolla, Dulzaineros del Guadalope, Artesonado, Tintirinullo, Kuatro Kabras Folk…, atestigan a suya trayeutoria y saber fer.

En iste nuebo proyeuto, Miguel Ángel Royo, José Manuel Alba, Elena Martínez y Chabier Crespo se miran d’escatizar o calibo d’a tradizión mosical d’o zentro y sur d’Aragón,  a l’alufra de sons atemporals ispiraus n’os paisaches a zillos d’o Sistema Iberico aragonés y n’os sasos solencos d’os Monegros y a Ribera l’Ebro.

Fendo serbir estrumentos acusticos, amás d’a boz d’Elena, nos combidan a esnabesar a suya propuesta sonora farchada de romanzes, danzes, billanos…, enllá de güegas y comenzionalismos.

Mosica “biella” y “moderna” de bez, temas tradizionals adrezaus per Lobaparda y belatros de composizión propia alazetaus en esquemas tradizionals; cantas an que destaca la boz en chunto con temas estrumentals de tot.